વૈશ્વિક સ્તરે કાર્યરત અગ્રણી ફાર્મા કંપની ગ્લેક્સોસ્મિથક્લાઇન (જીએસકે) વિશ્વમાં ઝડપભેર વૃદ્ધિ કરી રહેલા દવા બજાર ભારતમાં બે

અબજ ડોલરનું મૂલ્ય ધરાવતા એક્વિઝિશન્સ કરવા તરફ નજર દોડાવી રહી છે.

આ અંગે જીએસકેના સીઇઓ એન્ડ્રુ વિટ્ટીએ કહ્યું હતું કે , ભારત સ્પષ્ટપણે અમારા ધ્યાનમાં છે. અમે 50 કરોડ ડોલરથી 2 અબજ ડોલરની વચ્ચે ખર્ચ કરવાની યોજના ધરાવીએ છીએ. હું ભારતમાં કંઈક ખરીદવાનું પસંદ કરીશ.

ભારતમાં એક અબજ ડોલરથી પણ વધુ ટર્નઓવર ધરાવતી અને 5,000 લોકોને રોજગારી પૂરી પાડતી જીએસકે મોટા કદનાં મર્જર અને એક્વિઝિશન્સ કરે તેવી શક્યતા નથી અને તે ખરીદી માટે વધારે પડતી રકમ પણ ચૂકવવા ઇચ્છતી નથી.

વિટ્ટીએ કહ્યું હતું કે , અમારી પાસે ભારતમાં ઇચ્છનીય બ્રાન્ડ છે , આથી વ્યૂહાત્મક પ્રીમિયમ ચૂકવવાની અમારે કોઈ જરૂર નથી. અન્ય કંપનીઓએ કદાચ આમ કરવાની જરૂર છે , પરંતુ અમારે નહીં.ભારતનું ફાર્માસ્યુટિકલ્સ બજાર વર્ષે 5.8 અબજ પાઉન્ડનું મૂલ્ય ધરાવે છે , જે વિશ્વમાં આઠમા ક્રમનું બજાર છે.