October 21, 2011

વાઘબકરી ચા નવા પ્લાન્ટ માટે રૂ.70 કરોડનું રોકાણ કરશે

ગુજરાત સ્થિત વાઘબકરી ટી જૂથે જણાવ્યું હતું કે , તે આ વર્ષે નવી ફેક્ટરી સ્થાપવા અને માર્કેટિંગ કામકાજ
માટે લગભગ રૂ. 70 કરોડનું રોકાણ કરશે. કંપની આ વર્ષે તેનું ટર્નઓવર 20 ટકા વધારી રૂ. 650 કરોડ કરવા પર મીટ માંડી રહી છે.

કંપનીએ જણાવ્યું હતું કે તેણે નવાં ઉત્પાદનો લોન્ચ કર્યાં છે અને હવે તે વધુ ને વધુ ' ટી લાઉન્જ ' ખોલવા પર ધ્યાન કેન્દ્રિત કરી રહી છે. ' ટી લાઉન્જ ' એવું સ્થળ છે જ્યાં ગ્રાહકો જુદા જુદા પ્રકારની ચાનો આસ્વાદ કરી શકશે અને ખરીદી પણ શકશે. રાજધાનીમાં બીજું ' ટી લાઉન્જ ' ખોલતાં કંપનીએ જણાવ્યું હતું કે તે મુંબઈ અને દિલ્હીમાં વધુ ને વધુ પ્રમાણમાં ' ટી લાઉન્જ ' ખોલશે અને વિદેશમાં પણ આવું એકાદ ' લાઉન્જ ' ખોલશે.

વાઘબકરી ચાના ગ્રૂપ એક્ઝિક્યુટિવ ડિરેક્ટર (વેચાણ અને માર્કેટિંગ) પરાગ દેસાઈએ જણાવ્યું હતું કે , રૂ. 70 કરોડના કુલ રોકાણમાંથી રૂ. 40 કરોડનું રોકાણ અમદાવાદમાં સ્થાપવામાં આવનારા પ્લાન્ટમાં કરશે.

હાલમાં કંપનીની ત્રણ ફેક્ટરીઓ છે અને તેની વાર્ષિક પ્રોસેસિંગ અને પેકેજિંગ ક્ષમતા 2.5 કરોડ કિલોગ્રામ ચાની છે. નવી સ્થપાનારી ફેક્ટરીમાં છ મહિનામાં જ વ્યાપારી ધોરણે ઉત્પાદન શરૂ થઈ જશે , આ સાથે તેની ચાની કુલ વાર્ષિક પ્રોસેસિંગ અને પેકેજિંગ ક્ષમતા 3.5 કરોડ કિલોગ્રામે પહોંચી જશે.

તેમણે કહ્યું હતું કે ટી લાઉન્જ સંપૂર્ણપણે નવો જ ખ્યાલ છે. અહીં લોકો આવશે અને લગભગ 40 જુદા જુદા પ્રકારની ચાનો આસ્વાદ માણશે. તેની સાથે ભારતીય નાસ્તો પણ હશે. જો કોઈએ ચા ખરીદવી હોય તો તે ખરીદી પણ શકશે. કંપનીએ આ ઉપરાંત જુદી જુદી માર્કેટિંગ પ્રવૃત્તિઓ માટે રૂ. 30 કરોડ અનામત રાખ્યા છે.

No comments:

Post a Comment