જીતવું કે કંઈ પ્રાપ્ત કરવું બધાને સારું લાગે છે. જીત તમારી ગતિને અનેકગણી વધારી દે છે. આપણે જ્યારે જીતીએ છીએ ત્યારે પછીના પડકાર માટે ઘણા વધુ તૈયાર થઈએ છીએ. મહત્વાકાંક્ષા આશા જગાડે છે અને એને પૂરી કરવાના આત્મવિશ્વાસમાં વધારો કરે છે. અમેરિકન એકિઝક્યુટિવોના કરાયેલા અભ્યાસમાં જણાયું હતું કે જે લોકો મિડલ મેનેજમેન્ટ સ્તર સુધી પહોંચવામાં સફળ થયેલા, તેઓ ધીરે ધીરે પોતાના કામ પ્રત્યે વધુ સજાગ થઈ ગયા હતા અને જેઓ ઓછા સફળ હતા તેઓ પોતાની ઊર્જા પોતાના કુટુંબ તથા ધાર્મિક સામાજિક પ્રવૃત્તિઓમાં વધુ ખર્ચતા હતા. 

જિંદગીમાં આગળ વધવાની ઇચ્છા હોવી અને આપણે એ પૂરી પણ કરી શકીએ તો એ સારી જ વાત છે પરંતુ એની મર્યાદાને ઓળખી લેવી પણ જરૂરી છે. અર્થશાસ્ત્રી એચ.એફ.કલાર્કના કહેવા પ્રમાણે મહત્વાકાંક્ષા એક મોંઘો આવેગ છે અને એને માટે એ વ્યક્તિએ ખાસ્સી ઈમોશનલ એનર્જી ખર્ચવી પડે છે. અલબત્ત, કોઈપણ રોકાણની જેમ એ પણ તમને પરિણામ આપે જ છે. મનોચિકિત્સક એલ્વિન સેમરેડે એકવાર કહેલું, તમે જે કંઈ ઇચ્છો છો એ પ્રાપ્ત કરી શકો છો, શરત એટલી જ કે તમે એની કિંમત ચૂકવવા તૈયાર હોવા જોઈએ.