કોર્પોરેટ જગત માટે આગામી સમય કપરોઃ ક્રિસિલ

વૈશ્વિક સ્તરે અનિશ્ચિતતાનું પ્રમાણ વધી રહ્યું હોવાથી ધિરાણખર્ચ વધવાની , નિકાસમાં ઘટાડો થવાની અને

ચલણ રૂપાંતરના દરમાં ભારે ઊથલપાથલ રહેવાની ધારણા વચ્ચે ભારતીય કોર્પોરેટ જગત માટે આગામી સમય કપરો રહે તેવી શક્યતા છે એમ ક્રિસિલના અહેવાલમાં જણાવવામાં આવ્યું છે.

ક્રિસિલનાં મેનેજિંગ ડિરેક્ટર રૂપા કુડવાએ ઇકોનોમિક ટાઇમ્સને આપેલી ખાસ મુલાકાતમાં કહ્યું હતું કે , વૈશ્વિક બજારોમાં નબળાઈ વધી રહી છે અને જોખમ ખેડવા અંગે ઘટી રહેલી ઇચ્છાને કારણે ઊભરતા બજારમાં જોખમ ખેડવાની ભૂખ ઘટશે , જેના કારણે વિદેશમાંથી ધિરાણ મેળવવા માંગતી કંપનીઓ માટે ભંડોળ મેળવવું મુશ્કેલ બનશે.

નજીકના સમયમાં કંપનીઓ માટે ભંડોળ મેળવવાનો ખર્ચ શા માટે વધશે તે અંગે સમજાવતાં રૂપા કુડવાએ કહ્યું હતું કે , સ્થાનિક સ્રોતો પાસેથી ધિરાણ મેળવવું પણ એટલું સરળ નહીં હોય કારણ કે , કેટલાક સમય દરમિયાન ઇક્વિટીઝમાં ઘટાડો થશે. વ્યાજના ઊંચા દરને કારણે બોન્ડ માર્કેટમાં થોડો ધમધમાટ જોવા મળશે અને આરબીઆઇ દ્વારા ચાવીરૂપ દરોમાં કરવામાં આવેલા વધારાને કારણે બેન્કો પાસેથી ભંડોળ મેળવવાનો ખર્ચ ઊંચો જળવાઈ રહેશે.

વૈશ્વિક અર્થતંત્રોએ તેમની નાણાકીય ખાધ પર અંકુશ મેળવવા માટે કરકસર કરવાની શરૂઆત કરી હોવાથી ભારતની નિકાસ પર પણ અસર પહોંચી શકે છે. ક્રિસિલના અહેવાલ પ્રમાણે , નિકાસમાં વૃદ્ધિ ધીમી રહે તેવી શક્યતા છે અને ગ્રાહકો વધારે સાવધ બની ગયા હોવાથી સ્થાનિક સ્તરે અત્યાર સુધી મજબૂત રહેલી ખપત પણ ઓછી થશે.

નબળા બજારને કારણે રોકાણ પર વળતરમાં ધોવાણ થવાથી ગ્રાહકોની સંપત્તિનું ધોવાણ થશે અને આથી માંગમાં ઘટાડો જોવા મળી શકે છે.

નજીકના ભવિષ્યમાં ભારતમાંથી બહાર જતા ભંડોળના પ્રવાહમાં મોટા પાયે ડોલરની ખરીદી થશે , જેથી રૂપાંતરણના દરમાં ભારે ઊથલપાથલ સર્જાઈ શકે છે એમ ક્રિસિલના અહેવાલમાં જણાવવામાં આવ્યું છે.

ક્રિસિલ રેટિંગ એજન્સીને ધારણા છે કે , આગામી ત્રિમાસિક ગાળાઓમાં અનેક ક્રેડિટ રેટિંગમાં ઘટાડો જોવા મળશે અને ડિફોલ્ટ થવાની સંખ્યા પણ વધશે. 2011-'12 ના પ્રથમ ત્રિમાસિક ગાળામાં જ ડાઉનગ્રેડની સંખ્યા 105 નોંધાઈ હતી , જે 2010-'11 ના સમગ્ર વર્ષમાં 269 હતી. 2010-'11 ના સંપૂર્ણ વર્ષમાં ડિફોલ્ટ થવાની સંખ્યા 105 હતી , જે વર્તમાન નાણાકીય વર્ષના પ્રથમ ક્વાર્ટરમાં 43 નોંધાઈ છે.